冇壓力踢得放盡情娛賓

　　國際冠軍盃4強戰周一早上有好戲碼，由意甲AC米蘭喺紐約大都會人壽保險體育場惡鬥英超車路士。兩支球隊自04年起經常喺美國之旅碰頭，雙方過往5次喺美國踢熱身賽未試過冇交收，最多「士哥」係04年費城之戰，一共交出5個入球。再以AC同車仔近期喺熱身賽入波數字偏高嘅表現嚟推算，今場入球數字應該唔低，大盤可取。

　　(now 632及621周一早上6時30分直播)

　　艾沙拉維心急交貨

　　AC米蘭喺熱身賽曾經對過華倫西亞及曼城，兩場都係開大。睇落教練阿里基正為球隊測試新陣式及進攻模式，以滿足老闆貝魯斯干尼要求。講開AC米蘭老闆，呢位意大利政壇猛人最近被判入獄，球隊上下都為此憂心。據悉球員希望喺美國贏得锦標為老闆沖喜，因此今場對車仔一定唔會揸流攤。

　　特別係正選前鋒艾沙拉維，雖然好多豪門都對「法老王」好有興趣，但AC卻講到明佢係非賣品，奈何上季尾狀態下滑，連洲際盃都冇得打正選。若要重新建立正選地位，對車路士一定要交出好表現至掂。而只要呢位後生仔肯用心比賽，今場熱身賽要攞到入球唔難。至於球迷好關心嘅巴洛迪利，雖然已經飛去咗美國與大軍會合，但由於狀態成疑，相信阿里基都唔會冒險派佢正選落場。

　　注入華麗元素冧阿布

　　與艾沙拉維情況相似嘅仲有車路士前鋒費蘭度托利斯，莫連奴用人一向嚴謹，所以費托冇貨交的話，新季又係坐多過踢。提到莫帥，自從佢重新接掌球隊之後，果然 從老闆阿布嘅意見為球隊注入更多華麗元素。早前與印尼及馬來西亞明星隊踢熱身賽時，車路士球員都踢得好開放，兩場合計取得12個入球，攻擊力甚為銳利。

　　由於呢類熱身賽冇乜壓力，預計今次雙方合演一場高娛樂性比賽，大盤可望順利開出。