尋日講完日職，今日可以留意日乙賽事，首選神戶勝利船主場讓櫪木SC半一，要上盤。勝利船今季演出正氣，力爭前兩位直接升班嘅決心非常大，主場戰績更屬於日乙之冠，值得長捧。櫪木SC位處中游，屬於陪跑分子，鬥志弱兼狀態差，受讓都要捧對家。

　　(周日下午5時開賽)

　　勝利船上季日職僅以一分之差降班，季尾有一輪強勁衝刺，證明班波唔曳，所以踢日乙有超班之感，尤其係主場十三戰取得十勝兩和一負，屬於各隊中成績最好。勝利船優點在於攻守能力平均，前鋒迪臣保保入球產量穩定，令球隊保持高水準。

　　櫪木SC近十場聯賽只係贏得一場咁大把，最近仲連續兩場捧蛋，踢落冇厘神氣。呢類球隊欠缺鮮明目標，決心自然唔夠，作客更加可能Hea踢，佢哋近四場聯賽作客一和三負，共失十一球，隨時被大炒。

　　馬模踢聯賽發威

　　另外，荷甲甘堡爾新升班，首仗主場出擊，士氣一定高，加上球迷熱烈打氣，讓得起NAC平半，要上盤。瑞典超馬模喺歐霸盃瀕臨出局，相信會集中力量喺聯賽搶分爭標，作客可望輕取弱隊咸史達斯。