名帅博弈 搏到甩翼

　　国际冠军盃决赛会喺美国迈阿密永明体育场上演，由皇家马德里决战车路士。今场係重量级热身赛，两军棋逢敌手，咁啱两位主帅都係倒戈出战，车路士教头莫连奴同多个皇马球星有牙齿印，今次仇家聚头，可谓爱恨交缠;而皇马新帅安察洛堤亦对当年畀车仔炒鱿耿耿于怀，两大名帅博弈，私底下都希望一挫旧东家，为自己争番啖气，大盘係今仗投注首选。

　　(now 632及621周四早上9时直播)

　　肥安寸王争啖气

　　莫连奴向来天不怕、地不怕，去到皇马执教后周围辣火头，最大胆係弃用西班牙帮大佬卡斯拿斯，因而得罪晒队内土砲，无法获得更衣室支持。莫连奴本来仲有葡萄牙帮班同乡撑住，不过佢教到走火入魔，连爱将C朗都顶佢唔顺，结果佢哋反目成仇，莫帅黯然离开皇马，非常冇瘾，今次佢话咁快就倒戈出战，咁要面嘅佢当然唔会放过呢次报仇良机啦!

　　莫连奴返到车路士地位完全唔同晒，球队上下个个都当佢神咁拜，佢有「乖仔」艾辛长伴左右，又有泰利及林柏特等老臣子拥护，管治根基扎实好多。车仔新季增添云坚基尔、舒贺尔尼等优质新将，又回收卢卡古及哥云迪布尼，整体战斗力和板櫈深度提高不少，大军于热身赛表现劲对办，至今保持长胜走势，近期更接连杀败米兰双雄，赢来清风送爽，今仗绝对唔怕同皇马斗攻。

　　C朗谷气要攞彩

　　皇马众星唔妥莫连奴好耐，其中天之骄子C朗近期仲畀莫帅寸係「A货朗拿度」，谷埋一肚气，係时候喺场上尽情发洩。皇马喺热身赛继续保持攻强守弱作风，得、失球数字高企，加埋主帅安察洛堤01年执教车路士时惨吃阿布无情鸡，条气当然唔顺，今次佢同样会掉转枪头斗旧主，必定唔想衰畀阿布睇。

　　两军上下都斗志鲜明，虽然只係无关痛痒嘅一项季前身赛锦标，但因上述因素令场波嘅竞争性同可观情大增，呢种场合双方各不相让胜负虽然难料，但炮製大量入波却可以预期，宜直取大盘。赛制方面，90分钟打和不设加时，立即以互射12码决胜。