莫连奴嘅主帅生涯战绩辉煌，包揽英超、意甲、西甲同葡超4大联赛冠军，又攞过2次欧联同1次欧霸盃锦标，成就卓越。不过，佢揸旗带队下却从未赢过皇家马德里，或多或少都係佢主帅生涯嘅一件憾事。

　　翻查往绩，「寸王」曾带领波图两度挑战「银河舰队」，仅录得1和1负;反而喺巴塞做助教时，就曾有过5次击倒皇马嘅纪录。莫帅离队后话咁快就有机会倒戈皇马引来全球瞩目，但佢要战胜旧主却有一定难度。03/04球季係波图全盛时期，最后更夺得欧联冠军，不过球队于分组赛2斗皇马都落于下风。

　　曾带波图两斗舰队

　　主场迎战「银河舰队」，波图虽先开纪录，但最后倒输3球;作客一场皇马因笃定出线而留力，但波图仅能赛和1比1。不过，莫帅喺巴塞任助教嘅4季中，10次对赛皇马取得5胜2和3负，今场能否打破宿命，就要打过先知。