欧霸杯之外，听朝仲有南美波玩，当中巴甲传统劲旅华斯高主场迎战邦迪比达。华斯高刚有前里昂罚球王祖连奴比南布肯奴(P祖)回巢，士气大振，可恰死近况低迷嘅邦迪比达，阿King认为主胜捧得过。(周五早上8时开赛)

　　邦迪比达态沉雪上加霜

　　唔好睇P祖已经三十有八，其实佢Keep得几好，自从由美职嘅纽约红牛回归后，持续大勇，上月作客硬撼上季盟主富明尼斯先开纪录之馀，并交出两个助攻为球队奠胜，跟住对基斯奥马又打破僵局，上仗力战仅负一哥保地花高虽败不辱，当中P祖亦交出助攻，证明呢位前里昂罚球王宝刀未老，成为燃点前场攻力嘅导火线，绝对唔讲得笑。

　　相反对手邦迪比达今仗有守将费朗停赛，冇咗呢位主力中坚喺防线压阵，可谓雪上加霜，连埋盃赛在内，佢哋近六仗只曾一胜，正值低潮，华斯高上仗对保地花高输得唔抵，誓要搵邦迪比达出气，主胜有计。

　　至于阿甲方面，拉鲁斯喺开锣日轻取贝格拉诺三蛋，新兵辛迪亚高马田施华表现对办，作客拉尔费拿可乘胜追击，小让平半值博。(周五凌晨4时开赛)最后南美球会盃首圈次回合，玻利维亚奥利恩特主场对巴拉圭嘅瓜兰尼，首回合奥利恩特作客顶得住守和0比0，挟住上季高原主场十一战十胜嘅佳绩，平手盘梗係要奥军喇。(周五凌晨4时45分开赛)