试紧阵难炒慕逊加柏

　　新一季德甲今晚开锣，揭幕战班霸拜仁慕尼黑主场迎战慕逊加柏，拜仁喺德国盃首圈作客半力大炒列顿，加埋季前嘅电讯盃决赛曾经大炒慕逊加柏5比1，再遇啱啱喺德国盃首圈畀丙组仔淘汰嘅慕逊加柏，主W赔率热到辣手，不过考虑到慕逊加柏嘅硬朗防线经常可以困扰拜仁，主队喺新帅哥迪奥拿带领下仲不停试紧阵式同踢法，现阶段唔容易大炒对手，今场大细中位数调整到3.5球，黑柴推介1.85倍细盘。

　　(有线61及201台周六凌晨2时30分直播)

　　拜仁季前热身赛始终赢唔到掌声，哥迪奥拿尝试嘅「4141」、「巴塞式」嘅短传中路入渗同埋无锋阵都惹人诟病，球队踢法比上季沉闷得多，而且热身赛不能作准，睇番季前最重要嘅正式赛事德国超级盃，佢哋就畀多蒙特技术击倒，虽然哥迪奥拿喺其后嘅德国盃对阵式上已经作出妥协同微调，但组织进攻嘅爽朗程度仍然无法同上季相比，今晚主场踢联赛揭幕战，哥帅赛前又心大心细想试吓「433」阵式，但从赛前分队赛观察，一双箭头文迪苏杰同比沙路都唔喺正选队，如果再用无锋阵，要撕破慕逊加柏防线将会更加困难。

　　敲埋4.15倍「让球和」

　　慕逊加柏喺电讯盃对拜仁好明显只係轻装上阵，德国盃踢足120分钟咬唔入丙组仔达斯泰特，最终射输埋12码，不过无损士气，后防主将赞迪斯基赛前仲话球队已经准备就绪，个个情绪高涨，好有信心交出好表现。慕逊加柏今季增兵得宜，上季喺弗赖堡大放异彩嘅攻击手麦斯古斯、曾効力哈化柏林同史浩克04嘅巴西锋将拉菲尔基达奴，同向利华古逊借用嘅德国U20中场基拉马都係实力派，况且球队防线已夹熟，凭硬淨踢法足以困扰拜仁锋将。今场入球大细中位数去到3.5球偏高，细盘可捧，黑柴相信拜仁赢2比0机会较高，如果求好分，可以敲埋有4.15倍嘅拜仁「-2」嘅「让球和」。