慕逊加柏主帅法夫尔崇尚硬朗抢截作风，呢种踢法往往令拜仁吃尽苦头，自从佢喺2011年2月上任后，慕逊加柏喺正式赛事同拜仁交手6次，成绩2胜2和2负不落下风，而且两场败仗都係仅负1球，其中3次作客去到拜仁嘅安联球场胜和负各一。

　　事实上，慕逊加柏近年财力同实力虽然无法同昔日风光时期相提并论，但对拜仁总有办法，尤其开锣戏，拜仁喺近15季德甲首轮赛事只输过两场，两场都係输畀慕逊加柏，包括前季德甲揭幕战，由法夫尔领军爆冷赢拜仁1比0。再数番慕逊加柏近5次作客对拜仁都未输过超过1球，如果以今仗入球大细中位数计，5场波都开细盘。

　　至于拜仁，虽然上季联赛首轮大胜格雷特霍夫3比0，但对手最终只係包尾大幡降班球队，睇番之前4季，由08年起分别主场和汉堡2比2，作客和贺芬咸1比1，主场赢禾夫斯堡2比1同前季输畀慕逊加柏，足见呢支德甲班霸向来慢热。