加盟东方波经 同黑柴双剑合璧

　　「有线德甲通」刘舜文强势加盟《东方波经》，新一季将畅谈德甲形势、战况同畀投注贴士，佢同苏斯黑柴双剑合璧，肯定係全城最强!舜文认为，新季德甲拜仁依然係大超班，但过渡到「哥迪奥拿时代」，会出现劲多变数，而「蜜蜂兵团」多蒙特，仍係拜仁争取衞冕嘅最大威胁。

　　哥迪奥拿压力大

　　舜文话德甲好睇之处，係周时为球迷带来惊喜：「98年凯沙罗顿以升班球队身份夺标，07年史特加、09年禾夫斯堡爆冷称霸，德甲真係周时估佢唔到。拜仁上季成欧洲三冠王，今季联赛依然係大超班，但轩历基斯离开，哥迪奥拿揸旗，佢顶唔顶得住巨大压力，将係拜仁今季成败关键。」

　　「哥帅喺巴塞已经证明自己实力，但到另一国家执教，要适应新环境唔係易事。拜仁上季超成功，乜锦标都攞晒，哥帅叻极今季都係打成平手，压力劲大。係人都知拜仁高层、球迷难服侍，有乜依郁都插到佢晕，加上马里奥葛斯同堤亚高艾简达拿来投，中场线爆晒棚，佢点排阵及点同一班球星协调，好考功夫。拜仁换帅令球队争标增添好多变数，新一季食粥食饭，就睇哥帅带队功力;拜仁衞冕最大敌人，就係自己!」

　　舜文认为，多蒙特、史浩克04及利华古逊于新季可紧随拜仁其后，而史特加及禾夫斯堡亦可扰乱大局，反而法兰克福及弗赖堡，就难以继续神奇。