多蒙特 留罗拔仔显诚意

　　拜仁最大挑战者，新兵米希达利恩、奥巴美扬有级数，赢出德国超级盃就係最好证明。佢哋宁愿下季免费流失罗拔利云度夫斯基，今夏都唔卖畀拜仁，显出争标诚意。

　　史浩克04 后防不稳成障碍

　　小弟由01年开始支持史浩克，呢班波係有质素，上季打起中场达斯拿，呢位小将进步幅度认真惊人。争标最大障碍係后防不稳，若未能及时改善，将早早被拜仁、多蒙特甩开。

　　利华古逊 希比亚单飞考牌

　　虽卖走主力舒贺尔尼，但购入孙弘民同罗比古斯，突击能力值得憧憬，加上其他新兵加盟，实力可以保持。较大变数係今季由希比亚一人执教鞭，效果尚待观察。

　　史特加 有Heart拦路虎

　　新季增兵好有Heart，睇得出史特加真係想力争上游。其中签入上季澳职最佳球员及最佳新人、墨尔本胜利中场马高洛查士，以及收购利华古逊后防舒华比最有惊喜，如打出水准，可成拦路虎。

　　禾夫斯堡 冇乱买人够明智

　　阵中係有好多好球员，例如迪亚高等，但就硬係发挥唔到。今夏佢哋痛定思痛冇乱买人，反而作出针对性收购，其中引入上季德甲十大中坚之一添姆高路斯就好明智，相信新季成绩会唔错。