急先锋攞惯头彩

　　首轮德甲全面展开，今晚3场比赛有直播，当中奥格斯堡主场迎战「蜜蜂兵团」多蒙特。客军向来係德甲急先锋，准备工夫不嬲做得比人早，全队已经蓄势待发，面对质庸兼失血嘅弱旅奥堡，即使作客都足以轻鬆取胜，推介2.2倍多蒙特「让球客胜」。

　　(有线61及201台周六晚9时30分直播)

　　多蒙特贵为10-11同11-12连续两届德甲盟主，上季虽然畀班霸拜仁慕尼黑抢番宝座，却喺欧联杀入决赛，球队进度持续，今季虽然畀拜仁撬走咗「金童」马里奥葛斯，但得到适当补充后，实力未见削弱，仍然係拜仁最强劲对手，等閒德甲球队好难顶得佢哋住，何况佢哋喺少帅高普手上做惯急先锋，近5个球季首轮比赛赢咗4场，今季佢哋嘅准备工夫亦做得出色，喺季前德国超级盃就以4比2技术击倒拜仁，攞番个彩，然后于德国盃作客轻取威廉港，球员状态提升得快，加上今季正选人脚变动唔大，夹惯夹熟下尽佔先机。

　　奥堡痛失南韩双星

　　奥格斯堡係不折不扣德甲弱旅，上季护到级存有好大运气成分，当中进攻线上嘅南韩双子星具滋哲同池东沅助力极大。不过两人只係分别向禾夫斯堡同新特兰借用，今季双双归还原队，球队又冇钱补充，实力进一步削弱，今季最重要新兵喺由土耳其特拉布宗自由转会嘅前德甲兵哈利艾天托普，不过此子阔别德甲多年，亦已年过三十，现阶段未必帮到几多;加上阵中亦有曼宁加、马素迪庄、奥图同艾斯泰迪宾斯等主力因伤缺阵，面对欧洲其中一支最强球队摆明唔够砌。