弗赖堡係上季德甲最令人惊喜球队，呢支小球会最终以第5名过终点，主帅施特拉希亦当选最佳教练，风头不逊拜仁嘅三冠教头轩历基斯。不过小球会攞到超额成绩，好多时都无法避免被挖角嘅后遗症，弗赖堡阵中多名表现出色嘅主力今夏被列强瓜分，球队实力大跌Watt，施特拉希巧妇难为无米炊，今晚作客面对联赛三哥利华古逊听炒格，捧2.05倍「让球主胜」。

　　(有线64及203台周六晚9时30分直播)

　　弗赖堡今夏连环失血，主力球员包括麦斯古斯、马基亚迪、卡利古尼、富隆同真罗辛度相继他投，补入嘅球员当中，只有老将前锋汉基较有经验，其馀都有待磨练，短期内战斗力无法同上季相提并论。

　　另一边厢，利华古逊虽然失去咗舒贺尔尼同丹尼尔卡华积，但补入嘅孙弘民、罗比古斯同古利奥当拿迪都甚有分量，中场小将悉尼森姆喺热身赛同德国盃表现大勇，今晚主场出击有力轻胜一仗。