奈梅亨出靓女抹车打气桥

　　荷甲球会奈梅亨为鼓励球员，今季搞搞新意思，但凡球员取得每场比赛「Man of the Match」，即可获赠免费洗车服务一次，最吸引地方係负责洗车嘅唔係一般洗车工人，而係三位穿着比坚尼嘅惹火女郎，相信可以激起一众身为雄性动物嘅奈梅亨球员斗志。

　　奈梅亨为咗令球员更积极比赛，结果度出呢个咁诱惑嘅奖励计划，首位「得益者」係冰岛中场球员域陀柏尔臣，佢喺早前对西甲奥沙辛拿嘅热身赛获选为最佳球员，即时得到三位索爆比坚尼女郎帮佢洗车，睇见都够过瘾，佢仲影咗张相Post上Twitter「晒命」，认真得戚。好可惜球队上周荷甲揭幕战于主场以一比四大败在格罗宁根脚下，想再有靓女帮佢哋洗车?相信要加倍努力喇!

　　上晒力「-2」照捧

　　讲番奈梅亨今轮联赛，作客撼争标热门之一燕豪芬。燕豪芬上周作客胜海牙三比二，表面上赢得好险，不过其实佢哋喺嗰场比赛早早领先三比○，为留力欧联外围赛先至会喺末段放软手脚。如今球队已在欧联顺利晋级，可以专心求胜，今场係佢哋今季联赛首度主场出击，战意高昂，「让球主客和」燕让二球都要捧「让球主胜」。(now 670及672周日凌晨2时45分直播)