甘马雷斯未够班爆冷

　　葡超盃由上季联赛冠军波图对上季葡盃盟主甘马雷斯，自09年起葡超盃改喺阿威罗举行之后，波图就直落4度捧盃。今年遇到实力唔强嘅甘马雷斯，相信波图极有机会再度胜出，缔造5连霸威水纪录，「让球主胜」值得捧场。(有线155台周日凌晨3时45分直播)

　　波图近年喺葡萄牙恶到打横行，一对首都球队宾菲加及士砵亭都唔够挥。以前所讲嘅葡超「Big3」已经名存实亡，波图独大已成不争事实。既然里斯本双雄都搞唔掂，甘马雷斯就更难睇好。话就话波图有唔少球员被卖走，如占士洛迪古斯以及摩天奴季前都已转投摩纳哥。

　　不过阵中仍有唔少高质新秀可派上场，特别要留意係哥伦比亚新星祖安昆特路，此子喺世青盃表现抢镜，左脚仔有脚法又有脚头，相信到葡超必有一番大作为。唔好忘记，哥伦比亚球员如法卡奥及积臣马天尼斯都能够喺波图取得成功，祖安昆特路今季係葡超大放光芒唔出奇。

　　近两次对赛都吞4蛋

　　甘马雷斯近期频频「拍跳」以催谷状态，但其实演出认真麻麻，刚赛更以大比数1比4不敌基维辛迪，睇落状态仍有不足。况且近两次对赛都以0比4不敌波图，今场都几难打破不利数据。葡超盃强弱分明，「让球主胜」开出机会极高。