社区盾开火爆曼郡打吡

　　今晚温布莱球场上演英格兰社区盾赛事，大曼彻斯特郡球队曼联同韦根正面交锋，「红魔鬼」进入后费格逊时代改由莫耶斯领军，莫帅决心争夺季内首个锦标，但大军季前热身赛表现一直唔对办，今场让到球半、两球，要淨胜三球先收晒成个盘，风险极高，简简单单热捧1.5倍大盘好过啦!

　　莫耶斯接手瓣瓣唔顺

　　传奇主帅费格逊管治曼联廿六年半后宣告收山，今夏将帅位交畀苏格兰同乡莫耶斯，当时有唔少人质疑莫帅欠缺执掌大会经验，担心佢带唔掂「红魔鬼」。睇番曼联喺季前热身赛演出，佢哋确实冇咗以往嗰道霸气，喺日本两站对住横滨水手及大坂樱花、作客瑞典对AIK苏纳都赢唔到，只能大炒杂牌军澳职明星队及香港球队杰志，整体发挥确係唔多掂。

　　「红魔鬼」今夏增兵唔多顺利，签唔到两大目标法比加斯及堤亚高艾简达拿都算嘞，莫耶斯仲搞唔掂有离心嘅朗尼，呢位英格兰星级射手近日被安排同预备组练波，明显被打入冷宫，今战上阵机会唔大。曼联前线可倚重上季神射手尹佩斯，但佢哋对上六场热身赛全部有失波，刚喺周六凌晨嘅里奥费迪南纪念赛对西甲西维尔都失三球，后防坚唔稳阵。

　　韦根新兵格兰荷特有料到

　　韦根由英超降落英冠后，今夏亦换帅，搵咗同样来自苏格兰嘅奥云高尼领军，佢曾带领般尼杀上英超，有啲料到，奥云高尼今季帮球队签到唔少实用球员，最正係引入诺域治射手格兰荷特，呢个大旧佬踢法简单直接，顶上功夫一流，今战有力威胁曼联防线。翻查往绩，对上四届社区盾全部开大，四战加埋入咗十八粒，入球大值得捧场。

　　近五届社区盾成绩

　　年度 冠军 亚军

　　2012 曼城 3:2 车路士

　　2011 曼联 3:2 曼城

　　2010 曼联 3:1 车路士

　　2009 车路士 2:2 曼联

　　车路士12码胜4:1

　　2008 曼联 0:0 朴茨茅夫

　　曼联12码胜3:1