所谓热櫈(Hot Seat)，其实係指难以应付嘅职位。就现今欧洲球坛嚟讲，曼联领队莫耶斯以及拜仁教练哥迪奥拿就坐紧Hot Seat。有句说话叫高处不胜寒，但Peter可以同你讲真正劲人係唔会怕寒。若果莫耶斯以及哥迪奥拿可为球队取得佳绩，就能真正向全世界证明自己係有料之人，向住殿堂级进发。老实讲，曼联以及拜仁有大把好球员，加上个个都经验丰富，球队已有齐夺冠嘅最基本元素。莫耶斯同哥迪奥拿又使乜担惊受怕吖，惊咪两份囉!

　　默默耕耘 终会成功

　　暂时两个名帅嘅初步印象都唔错，先讲曼联莫耶斯，「红魔鬼」刚啱访港遇着质素麻麻嘅大球场草地，但莫耶斯都冇左弹右弹，如常保持认真态度，为球队作好备战工作，暑期收购球员计划係就係唔太顺利，但莫耶斯都冇批评或不满，继续默默耕耘做实事。哥迪奥拿一样，德甲首战就带领拜仁赢波，总算有个好开始。咁究竟两个领军之人可唔可以取得大成功，成就拍得住上手主帅费Sir以及轩历基斯呢?依家讲当然係言之过早啦，睇完两个球季之后再作评论都未迟。