U21冇人肯教 鹤臣顶住档

　　「幼狮兵团」士气曳，压力大，虽有鹤臣督师，但亦难炒「细佬」!国际热身赛英格兰U21主场斗苏格兰U21，主队喺U21欧国盃三战全败，信心荡然无存，客军斗「英伦大佬」必搏，今战主W热爆，就捧晒「让球和」同「让球客胜」，博主队顶多小胜!

　　(now 621周三凌晨2时30分直播)

　　英格兰一向雷声大，雨点小，大国脚出晒名心理质素曳，估唔到班细嘅都係得个样。U21欧国盃及U20世青盃今年先后举行，英格兰U21嗰班喺分组赛三战全败耻辱出局，U20亦一场都赢唔到无缘出线，英军年幼阶层不知所谓，引来全国传媒、球迷劲插，呢班小将被剷到上天花板，今场虽有主场之利，但面对巨大压力，唔係话赢就赢。

　　史达宁惹官非冇心机

　　皮雅斯于「幼狮兵团」出局后被炒，早前英足总就公开招聘新帅，到依家都未有声气，大国脚领队鹤臣惟有顶住一场先，为今仗调兵遣将。睇番个阵容，大部分都係早前U21及U20嘅败家仔，仲要冇埋利物浦中场佐敦轩达臣，虽然补入红军翼锋史达宁，但佢最近惹官非，踢太公波战意难测，前线无论用域咸抑或哈利卡尼，攻力都唔见得劲。

　　苏格兰同英格兰同样来自英伦三岛，苏格兰不嬲都屈居英军之后，近年仲愈踢愈曳，甚至畀北爱尔兰、威尔斯过埋头，今次苏格兰U21乘「大佬」面对内忧外患，当然会搏老命，踩多「幼狮兵团」两脚。以波论波英格兰U21当然较劲，但球队士气低落或会陷于苦战，既然主W热到得1.32倍，就捧齐「让球和」同「让球客胜」好过，只要「小苏兵」唔输多过一粒都有得执。