破坏脑残Vs创造美斯

　　国际热身赛之夜，爆发「神与神」对决，意大利主场迎战阿根廷!「破坏之神」巴洛迪利与「创造之神」美斯正面交锋，展开一场神级较量，「脑残」巴洛迪利遇强愈强，欢喜颠覆传统，早欲挑战美斯球王地位，势必使出浑身解数「骚哥利」。美斯破门神力登峰造极，绝非意军褪色防线能抵挡，加上赛事係为祝贺方济各当选教宗而举行，双方应会大踢悦目足球娱宾，全力推介入球大。

　　(now632周四凌晨2时45分直播)

　　巴神攞威做生日贺礼

　　阿根廷籍嘅方济各3月获选为教宗，成为梵蒂冈新领袖，意、阿两国足总特此安排今场热身赛，向呢位「球迷教宗」致敬，开波前双方已获教宗接见。两军召入精锐准备做大骚，主角当然係两位长期人气高企嘅巴洛迪利同美斯，一向目中无人嘅巴神曾经讲过，只有美斯先至可以同佢相提并论，而佢更喺twitter上载自己别墅前嘅巨大喷泉石碑，上面用金黄色凋刻住「MB45」，仲有花园入面嘅一隻同真狮子同大细嘅装饰，自大到爆。

　　不过客观上，巴洛迪利个人成就同美斯相距甚远，佢更加想趁今次难得同场竞技，证明自己，必然搏命攞威，巴神刚于前日度过23岁生日，几大都要入波做礼物。

　　美斯出真功夫献教宗

　　至于美斯虽然日前因伤，缺阵对马来西亚明星队，但其实伤势并冇大碍，似係巴塞故意畀佢休息。教宗方济各早已表明係美斯嘅fans，令佢受宠若惊，梗係识感恩出真功夫，尽情数胡报答教宗支持。另外，拍档希古恩刚转投意甲拿玻里，并喺近期热身赛有出色表现，佢初到贵境，亦渴望喺今场瞩目大战，以入波向意国球迷打招呼。

　　唔好忘记，阿根廷仲有国际米兰射手柏拉斯奥、罗马进攻中场拉美拿、曾効力拿玻里嘅圣日耳门前锋拿维斯，以及多位意甲兵，领队沙贝拉明显想「以意制意」，一来减低球员舟车劳顿之苦，二来佢哋熟悉环境及对手状况，有助迅速入局火併。

　　意大利喺柏兰迪利执教下，已反传统，变成攻强守弱，睇佢哋6月洲际国家盃5战入10球失10球嘅大无畏演出，遇上锋线人才济济嘅阿根廷，想少入波都难。