身娇肉贵踢太公波

　　继5月斗爱尔兰后，英格兰迎来另一场「英伦三岛打吡」，周四凌晨于温布莱球场斗「细佬」苏格兰。「三狮兵团」有史杜列治、安祖卡路尔因伤落选，朗尼亦毫无状态;加上英超开锣在即，英军班大帝随时就住踢，面对硬淨苏格兰入波唔慌多，捧细!(now 621周四凌晨3时直播)

　　于英伦三岛，英格兰一向係大佬，但5月尾对住爱尔兰，「三狮兵团」战意奇低，最后主场仅和对手1比1，演出毫无亮点。讲句衰啲，英军不嬲见高就拜、见低就踩，早前两对巴西搏晒老命，主场赢出开心到震，但对住「细佬」爱尔兰就冇厘神气，真係见到都唔开胃。喺英格兰心目中，苏格兰地位甚至不如爱尔兰，球队隻「懒醒心魔」又会发作，好有机会又hea踢。

　　靠禾确特攻坚唔慌有用

　　另外，此类热身赛无关痛痒，英军班球星个个都身娇肉贵，一个唔觉意整伤咗、缺阵新季英超就真係喊都无谓，今战就算有主场之利，都唔使旨意班大帝会落力比赛。

　　对于前线兵微将寡，领队鹤臣多多理论，话黑山係有两个劲前锋(祖维迪同胡仙历)，但都唔係天下无敌，试图表达就算冇劲前锋在阵，都唔会影响英军攻力。但环顾今仗人脚，只有状态大勇嘅禾确特较有威胁，要撕破苏军后防唔係话咁易。

　　史特根执靓苏军防线

　　史特根喺今年1月开始执掌苏格兰，麾下战绩虽仅2胜2负，不过后防係稳固咗，而且搓波、控制比赛节奏等亦有进步。上仗作客克罗地亚，全场捱打都顶得住，虽然得保不失係有幸运成分存在，但后防演出硬淨亦值得一讚。今次作客斗「大佬」係史特根省招牌好机会，但佐敦洛迪斯、辛迪加斯等前锋有几多料，史帅心中有数，呢场肯定以守代攻，预料战情同之前英军斗爱尔兰差唔多，细盘有1.9倍值捧。