2013亚洲盃外围赛A组上演独脚戏，东南亚球队新加坡主场迎战阿曼，主队德籍教头史坦治对西亚球坛有深厚认识，今次倒戈斗阿曼熟晒对手路数，即使新加坡级数输蚀，仍有力顶住对手。阿曼守强于攻，相信今战入波唔多，入球细属投注首选。

　　(周三晚7时30分开赛)

　　史坦治早于十几年前去西亚搵食，2001年执教阿曼国家队，02至04年就带领伊拉克国家队，佢好熟西亚足球，呢次掉转枪头斗阿曼，必定会作出针对性部署。史坦治今年五月接掌新加坡，作出唔少大胆变动，包括召入17岁天才球星沙云迪，呢个超新星现时効力法国球会梅斯，前途无限。喺史坦治带领下，新加坡接连轻取缅甸及老挝，演出大有进步，唔好因为排名低而睇死佢哋呀。

　　唛死阿曼王牌前锋

　　阿曼名气最大嘅球员係英冠球队韦根门神艾哈比斯，呢个亚洲顶级门将今次并冇入选，不过，新加坡级数始终较低，估计阿曼防线唔会受到好大压力，少个门神影响唔算太大。防守从来都係阿曼强项，唔使太担心，反而进攻先係佢哋最弱嗰瓣，阿曼王牌前锋艾贺斯尼确係有分量，但球队过分倚重佢争取士哥，係人都知要睇实呢个危险人物，佢容易被盯死，预期今战入波一球起、两球止。