双方球星惊伤影响联赛开咧

　　今个周中国际赛档期有多场瞩目热身赛上演，亚洲王者日本会喺主场同南美冠军乌拉圭拍跳，今次对决睇落颇有睇头。不过，双方都有唔少球星喺欧洲主流联赛搵食，家阵啲联赛陆续开咧，为免有乜损伤，今战难免会有所避忌，玩细盘最好!

　　(有线61及201台周三晚6时20分直播)

　　日本早前喺东亚盃派出全日职阵容出战，最终仍然顺利封王，保住东亚王者地位，证明佢哋级数真係好高。主帅沙哲朗尼今次搵番大批外流球员帮手，曼联中场香川真司、缅恩斯前锋冈崎慎司、纽伦堡中场清武弘嗣及禾夫斯堡中场长谷部诚等悉数入选，连盛传会转投AC米兰嘅莫斯科中央陆军球星本田圭佑都在阵。

　　日本遣精锐摆款多过砌

　　不过，点兵齐脚唔等于一定会搏杀，依家德甲已重开，英超亦即将打到嚟，日本班海外兵团必定唔想因为一场太公波搞到受伤影响喺球会嘅前途。

　　另一边厢乌拉圭同样睇落好有诚意，佢哋初选大军名单有齐三大射手苏亚雷斯、卡云尼同科兰，不过，卡云尼已率先称伤退队，至于近排畀利物浦阻住转会嘅「哨牙苏」心情唔荒好，去到日本志在散心，佢依家只係一心谂住转会，必定唔想搏伤搞到走唔甩，所以就算落到场都係Hea踢。

　　两队都有份参战早前洲际国家盃，当时未有机会交手，今场波本来係几精彩，可惜赛期安排喺尴尬日子，预期双方会以唔伤为目标，和和气气捱到完场，捧细盘啱数。