领队变 球星变 形势跟住变

　　新季英超变天，曼联名帅费格逊退休，由莫耶斯继承霸业。寸王莫连奴回归车路士，比历连尼接掌曼城，3支前列球队齐换帅，领队变动成为球迷一大焦点。英超20路大军今夏暂时已豪掷3亿镑(约36亿港元)扩军，数字冠绝全欧，单单转会都备受瞩目。不过，无论点变，Big4旧势力仍然主宰争霸形势，最终冠军将不出曼联、曼城、车路士同阿仙奴呢4支传统劲旅，但Big4新季喺组军方针同收购策略方面落差好大，故预期英超将出现全新秩序，上季4强排名势必出现大执位。

　　两个莫帅 卡士有别

　　英超进入后费格逊时代，今夏最瞩目焦点係巨星级名帅莫连奴重返车路士，冇咗老对手费Sir阻头阻势，寸王更加肆无忌惮，一嚟就出招搞曼联新帅莫耶斯，多番表明要撬走「红魔鬼」当家星级朗尼，一度令曼联军心大乱。

　　车仔本身已经有卢卡古、费兰度托利斯及丹巴巴亚等射手，前线现人满之患，莫连奴斟朗尼分分钟只係为咗搞乱曼联档摊，佢随便讲几句，已令莫耶斯出现任内首个管治危机，真係唔同卡士。莫连奴04至07年带领车路士期间两夺联赛冠军，连费格逊都唔係佢对手，今季睇车仔个阵容已经好有冠军相，莫耶斯同佢斗，未开咧个势已经输晒!

　　曼城续施 银弹政策

　　曼城就再次以本伤人，新帅比历连尼使咗近1亿镑签下4大天王费兰甸奴、祖维迪、捷西斯拿华斯及尼格度，佢话好满意现有人脚：「曼城拥有全英超最劲嘅阵容，我哋签咗4位好劲嘅球员，相信班波会进一步升呢!」今次并非比帅首次施展银弹战术，佢于09至10季度执教皇马期间就试过豪使2亿镑(约2.4亿港元)买入C朗同卡卡等巨星，但最终得个吉!

　　佢当年离开皇马时曾表示：「皇马签咗好多超级球星，但并非球队需要嘅球员，大军攻守唔平均，点赢?」但佢讲一套做一套，曼城今夏只签中前场球员，忽略后防，头重脚轻係佢哋今季最大问题。

　　悭家云格 全力保四

　　比历连尼乱使钱，而阿仙奴主帅云格就仍旧「铎叔」，今夏全力进行减磅计划，放走箭头谢云奴、艾沙维同查马克等，但只係签咗年轻前锋耶耶辛洛高，暂时未有大手笔买人。不过，「兵工厂」胜在未有流失主力，新季将会继续食老本，仍然有力保住Big4之名。

　　环顾其他前列球队，热刺受到加里夫巴利转会传闻困扰，利物浦则出现苏亚雷斯嘅「叛乱」，两军主将都有离心，恐怕会削弱球队争入前4嘅机会。综观全局，Big4争霸之势虽然持续，但排名方面相信好大机会要重新执位嘞!

　　排名大预言

　　名次 上季排名 今季预测

　　1 曼联 车路士

　　2 曼城 曼城

　　3 车路士 曼联

　　4 阿仙奴 阿仙奴

　　5 热刺 热刺

　　6 爱华顿 利物浦

　　7 利物浦 爱华顿

　　8 西布朗 史云斯

　　9 史云斯 修咸顿

　　10 韦斯咸 纽卡素

　　11 诺域治 西布朗

　　12 富咸 阿士东维拉

　　13 史笃城 诺域治

　　14 修咸顿 韦斯咸

　　15 阿士东维拉 新特兰

　　16 纽卡素 富咸

　　17 新特兰 卡迪夫城(冠1)

　　18 韦根 史笃城

　　19 雷丁 水晶宫(冠5)

　　20 昆士柏流浪 侯城(冠2)