阿苏停赛 攻力打七折

　　「红军」上季喺主帅罗渣士带领下攞第七名，下半季愈踢愈顺，短传入渗踢法悦目又实际，不过，讲到尾都係要靠苏亚雷斯串连中前场，冇佢效果差好远。「哨牙苏」今年四月咬车路士守将伊云洛域被重罚停赛十场，家阵仲要坐六场越季波监，开咧战唔使预佢，利物浦今战冇阿苏，咁前面就要靠伤愈冇耐嘅史杜列治担大旗，呢个英格兰前锋射术係好，衰在有啲独食，但蜀中无大将，都要搵佢作先锋。

　　史笃城摆铁桶顶得住

　　「红军」今季食粥食饭其实係要睇进攻中场菲腊比古天奴嘅表现，唔少利迷叫佢做「古天乐」，呢个巴西版古仔自己搵到食，畀波亦得，喺「没有阿苏的日子」责任变得更重大，今战若想撕破史笃城大旧佬防线，就要靠晒佢啲致命直线喇!

　　史笃城上季完成护级任务，高层却照炒主帅佩利斯，真係唔知佢哋谂乜!大军新季由晓士带队，相信唔少球迷都记得佢上季季初点样搞到昆士柏流浪冧档，不过，史笃城好就好在冇乜钱畀佢乱花，现时人脚冇乜大变，睇番季前热身赛，佢哋都係用班打仔踢简单足球，首周联赛作客专心死守打突击，正路顶得住，结合近两次联赛作客晏菲路都互交白卷嘅靓绩，细盘可试。