趁莫耶斯未执掂队波

　　英超王者曼联衞冕第一击作客斗史云斯，「红魔鬼」进入后费格逊时代问题多多，大军今夏增兵处处碰壁，主力射手朗尼又有离心，新帅莫耶斯摆明舞唔掂队波。史云斯淨係射手米捷一个已经好难对付，今季仲多埋勐人韦菲特邦尼帮手，曼联让波牙烟，今场要「让球主胜」!

　　(now 621及620周日凌晨零时30分直播)

　　曼联上场杀败韦根赢得社区盾，新帅莫耶斯叫做有个好开始，但呢隻盃仔未能盖过佢领军初期所面对嘅问题。「红魔鬼」新季冇乜新兵，呢点所有球迷都知，莫帅又点会唔知吖，依家唔係佢唔想买人，而係买唔到人，今夏重心收购目标堤亚高艾简达拿争输畀拜仁，又唔够牙力撬唔郁法比加斯，近日传出想斟奥斯尔，睇怕都係得个讲字。

　　曼联增兵不成朗尼扭计

　　「红魔鬼」增兵不成，好衰唔衰朗尼又扭计，佢同莫耶斯早于爱华顿时期已交恶，相信都好难共事，虽然莫帅死撑话朗尼係非卖品，讲到佢好重要，但相信呢位球星就算留队都係冇运行，今战亦未必会落场。曼联右闸拉菲尔达施华有伤肯定缺阵，快翼艾舒利杨格及中场卡域克亦有伤，翼锋拿尼及查维亚靴南迪斯缺态，战斗力要打折扣。

　　史云斯上季捧走联赛盃贺创会100周年，新季加码签埋科特迪瓦射手韦菲特邦尼，大军控球能力强，但踢得较迂迴，而且进攻太倚重中锋米捷，家阵有埋把握力强嘅韦菲特邦尼助阵，前线侵略性进一步提高。曼联上季两战史云斯一胜一和，作客畀米捷士哥逼和一比一，主场搏到尾段先由里奥费迪南奠胜，赢得辛苦，史云斯依家变得更强，今战有力抢分!