上周重心推介英甲宾福特，佢哋顺利砌低锡菲联，真係好嘢!肥叔喺博彩行业打滚多年，喺英伦有人脉，宾福特主理人后生可畏，亦有涉足博彩业务，佢好尊重肥叔，今次见面有交流业界行情，又倾波经，讲足几个钟头。佢好有心搞波，将博彩业务交畀副手，专心打理球会，目标係杀上英超。

　　英超今日正式开咧，肥叔有同宾福特主理人倾今季英超大势，冠军之争不离三队，曼市双雄同车路士，佢本身有晒心水，预计曼城会拎冠军，车路士攞第二，曼联就係第三，呢个预测好正路。肥叔今季都唔睇好曼联，始终佢哋个新帅莫耶斯未够班，拍埋莫连奴度卡士输晒，人脚又唔係特别好，好难争!

　　苏斯达留力周中搏杀

　　讲番推介，今次主力反啲欧联参赛队伍，呢个赛事係全球最瞩目嘅盃赛，有名又有利，各国参赛队全副精神争位，暂时将联赛摆埋一边。西甲球队皇家苏斯达班底唔强，难兼顾西甲同欧联战线，嚟紧下周中欧联先係出击重心，今轮主场对基达菲唔会去尽，让波靠唔住，呢场捧基达菲!

　　(周日凌晨1时开赛)

　　胜率逾9成些路迪又食鸭

　　《球绩广场》为大家搜集各种纪录、战绩，作投注参考。头炮推介苏超鸭巴甸主场对些路迪，上季联赛冠军些路迪惯食「鸭」，双方近11次交手，些军取得10胜1和，胜出率超过90%，包括上季3次交锋全胜，难得今场客W仲有1.72倍，的确笋爆。些路迪对赛成绩上拥有压倒性优势，但要留意佢哋往往下半场，先至发力击溃鸭巴甸。近7次对赛，有6次上半场打和，其中4次更係互交白卷，2.15倍半场和亦值得考虑。(周六晚7时30分开赛)

　　锡菲联让得狠有料到

　　周末英甲有12场比赛举行，其中锡菲联主场对高车士打最为「有趣」，话晒高车士打係联赛两战两捷，属季初其当弗球队之一，但奇就奇在主队要让高车士打半一咁多，赔率完全同近绩不相符，超级蛊惑。

　　其实大家都知锡菲联已经两连败，英联盃输过畀伯顿之后，上周又以较大比数不敌竞争对手宾福特，计赛绩唔係高车士打个皮，但今日执番主场之利即刻热透，摆到明有计。锡菲联被认定为来季升班热门球队，球迷唔好咁早睇衰佢哋，呢个上盘应该可以顺利开出。(周六晚10时开赛)

　　QPR退热咪走宝

　　《We Trick》首次同大家见面，此栏专门帮大家发掘一下有咩蛊惑波，今日头炮推介英冠昆士柏流浪(QPR)。昆士柏流浪今季由英超降落英冠角逐，虽然有多名大牌球星基斯杜化森巴、雷米、朴智星、泰拉拔先后离队，但由于有名帅夏利列纳领军，依然被外界视为升班大热，首轮联赛击败锡周三及于英联盃淘汰埃克塞特亦表现得十分对办，点知上轮作客去季护级球队哈特斯菲尔德却只能打和1比1，累死唔少上盘客。

　　睇番佢哋过去两季连盃赛在内，原来从未试过三连胜，上场赢唔到似乎唔係表现唔好咁简单，夏利叔打滚球坛多年，脉络唔简单，今次返回主场对住作客两连败嘅叶士域治，上盘让半一明显退晒热，相信又係起筷时候。(周六晚10时开赛)

　　米堡主帅博炒难让黑池

　　《铺针插线》首次同大家见面，我哋喺欧洲各大小球会都放晒针，出尽法宝劲刮各支球队背后勐料、秘料，大爆佢哋鲜为人知嘅一面，为读者作出「深层推介」。

　　今日首先送上英冠米杜士堡内乱作为见面礼，米堡领队莫比利自2010年上任后冇齣好戏，今年又话要冲击前6，球迷都觉得佢废噏当秘笈。莫比利近期弃用当家前锋安尼斯，又公开话班球员冇用，长年累月踢唔出自己赛前部署，激到老细史提芬吉逊生虾咁跳。球队极高层消息透露，英国时间周四史老闆捉住呢名庸帅照肺，据讲双方现时关係紧张。一向「赖皮」嘅莫帅分分钟乱嚟博炒，今晚主场都让唔起黑池平半。 (周六晚10时开赛)