寸王莫连奴今夏回巢重掌车路士，联赛首战坐镇史丹福桥主场扑击升班球队侯城，莫帅之前带领车仔喺联赛主场保持60战不败，赛绩坚硬淨。侯城老细阿拉姆(Assem Allam)帮球队改名叫侯城老虎，但呢班波只係冇牙老虎，顶唔住车仔狂轰，莫帅回归头炮可大胜一场答谢车迷支持，热捧入球大，再取「让球主胜」!

　　(now 620及621周日晚11时直播)

　　主场唔识输字点写

　　车路士今夏最重要收购係搵番莫连奴归位，佢阔别英超近6年，仍属车迷至爱。呢个超级教头04至05季度上「车」，当季即以95分破英超纪录夺冠，佢带队3年零3个月期间赢得英超及联赛盃冠军各两次，又捧过足总盃同社区盾，连曼联传奇教头费格逊都怕咗佢。喺莫帅带领下，车路士联赛主场60战46胜14和，主场出击唔识个输字点写!

　　莫连奴早于02年带波图时期开始製造呢个主场恐怖纪录，及后执教车路士、国际米兰同皇马将个人主场联赛不败数字增至150场，直到2011年4月皇马不敌希杭先至断缆。而车仔喺阿布入主后过去10季联赛主场首战例赢(见附表)，除斗劲敌曼联同阿仙奴仅小胜1粒，其馀赛事例必开大，佢哋曾于09年面对侯城，当年只係小胜2比1，但今次有超强新帅效应刺激，一定尽数对手。

　　侯城改名冇乜人骚

　　车路士今夏引入德国球星舒贺尔尼及荷兰小将云坚基尔，中场人手充裕，佢哋又由西布朗收番射手卢卡古，前线仲有费兰度托利斯同丹巴巴亚，几大射手争位，对侯城抢入波绝不手软。侯城老细阿拉姆今夏将球队改叫侯城老虎，仲特登设计咗一件橙黑直间状似虎纹嘅新球衣，希望推广球会品牌，可惜英超赛会却唔多理佢，官方仍然照叫番侯城，甚至连佢哋目己嘅球迷都话改名十分「无厘头」。

　　不过，无论改名好换新衫好，呢支升班球队最大问题係前线冇料到，新特兰借将丹尼格拉咸上季尾已有哑火迹像，另一箭头恩历克沙保亦唔係咁掂，去到史丹福桥势被围攻，大败係意料中事。

　　莫连奴(车路士)：上季车路士四分五裂，我希望重整呢个「蓝色的家」，我希望球迷支持球队同球员，不论高低起跌，一直与我哋同在!

　　布鲁士(侯城)：我希望所有球员喺场上证明自己真係够料打英超，以前佢哋会质疑自己，依家要把握机会好好表现，我深信佢哋够班!