英超刚啱上演过首轮赛事，相信球迷对各支球队都有初步了解。对于一班资历较深嘅球迷嚟讲，今个英超球季感觉较为特别，因为曼联后备席唔会再睇到费格逊。失去咗一位具叫座力兼有魅力嘅领队在场，心理上好似若有所失。但正所谓天下无不散之筵席，相信隔多两三个月，球员及球迷就可以适应过来。

　　当然，「寸王」莫连奴回归车路士亦係一个焦点。费Sir退休后，莫连奴就成为英超其中一个具级数嘅领队。Peter知道好多「车迷」都对莫帅回归有好大憧憬，但现时就话车路士有能力取得最后胜利实在言之过早，始终暑期转会市场要到九月先至关闭，仲有时间畀大球队进行重磅收购，球队战斗力可以喺大约两星期内出现好大变化，争标形势随时会翻天覆地。

　　总括而言，费Sir退休令英超出现禾雀乱飞局面，今季随时会有异军突起。Peter喺度引用一句赛马术语，就係热门不稳。咁究竟边队叻啲，睇到下个月中应该有眉目，届时同大家再分享。

　　德西仲係四队之争

　　除英超之外，德甲同西甲都已展开新一季角逐。比起英超，德、西形势相对较为单纯，两个冠军只得四队争。德甲有拜仁及多蒙特，前者粒粒皆星实力早已证明，后者有高普呢位有料之人领军，今季一样有强大竞争力。西甲冠军之争离唔开皇马及巴塞，皇马有安察洛堤执教，佢赢过英超、意甲及法甲冠军，经验丰富对皇马争标必有帮助。巴塞有巴西球星尼马加盟，属新季巴塞最大看点。

　　金句：一个wide open的英超球季