受红魔屠鹅刺激 杀意大盛

　　英超头轮最后一场由富豪球会曼城守尾门，主场出战英超「法国兵团」纽卡素，曼城今夏豪使近1亿欧元(约10亿港元)扩军，今次可尽情大晒豪华攻击阵容，眼见同市死敌曼联刚于周日凌晨大炒「天鹅」史云斯，更能激起曼城将帅争胜决心，今仗定全力扑击「喜鹊」，何况两军近季于曼城主场交手频演入球骚，捧大稳阵!

　　(now 620及621周二凌晨3时直播)

　　让得太多 上盘玩唔过

　　曼城老细文梳亚请完主帅文仙尼食无情鸡，跟手由西甲马拉加撬走智利「工程师」比历连尼领军，再拎出1亿欧元畀佢招兵买马，目标非常明确，就係要由死敌曼联手上重夺英超霸主之位，同时于欧联挑战欧洲列强。

　　随住射手尼格度、祖维迪同快翼捷西斯拿华斯等勐人来投后，曼城拥有全英超最强攻击阵容，前线可以搵阿古路拍尼格度或迪斯高，甚至安排后两者玩双塔战术，任你点变都得，弱旅遇着佢哋，即使採取稳守甚至死守战术都未必有用。

　　不过，曼城亦并非全无弱点，佢哋今季最大隐忧係防线后备力量不足，中坚拿斯达锡今仗因伤缺阵，已经要用到尼史葛伙拍队长高柏尼扼守中路，尼史葛话就话係英格兰边缘国脚，但顶尽只係欧洲二、三流中坚，一句讲晒，冇卡士!门将赫特以往表现可靠，但近排阵上慌失失，代表英格兰时更大出洋相，球队于季前热身赛对阿仙奴及AC米兰都失3球，似乎唔係偶一为之，今战让到球半/两球略嫌太多，上盘玩唔过。

　　法国帮孭飞 负隅顽抗

　　纽卡素今夏于转会市场冇乜大动作，主要收购係由昆士柏流浪借用法国射手雷米，阵内法国兵增至11人。「喜鹊」法国帮势力不断膨胀，正面睇班友同声同气，可缩短磨合时间，但其他帮派完全失势，特别係本土派冇晒地位，好容易造成更衣室分裂嘅局面。

　　不过，雷米今战受伤暂时未可披甲，但好彩仲有两大进攻重心宾艾化同柏比斯施斯撑住，尚有多少反击能力。翻查往绩，曼城近5次主场对纽卡素全胜兼全大，因此继续追大係正路选择。

　　领队Chit Chat

　　比历连尼(曼城)：我哋有4个前锋，依家我都唔知派边个出场。但无论最后选择係点结果都係一样，因为佢哋个个都咁劲。

　　柏杜(纽卡素)：我哋冇曼城咁有钱，根本冇得比。上季喜鹊表现唔好係事实，所以外界对我哋冇乜期望或者係件好事。