今晚欧联外围赛附加赛首回合激战连场，葡超费利拿恶战俄超班霸辛尼特，由于前者主场太细，被迫要移师波图嘅火龙球场举行，实力唔够揪之馀，仲冇埋地利认真湿滞，相反辛军前锋侯克今仗重返旧东家主场比赛，定必踢得起劲，客胜有1.75倍不容错过。

　　(有线62及202台周三凌晨2时45分直播)

　　上季在葡超异军突起嘅费利拿，今季流失包括中场发电机雷斯卡路士、迪奥高费古拉斯及安顿尼斯等主力，但又冇乜点增兵，想借曼联水货碧比又因莫财，倾到依家都仲未倾掂数，实力严重受削下，开锣日输畀布拉加一战全无还手之力。最惨係费利拿个主场实在太细，只能容纳约5,000人，唔符合欧洲足协嘅标准，搞到被迫要移师去波图嘅主场火龙球场作赛，家阵连主场之利都冇埋，形势又衰多二钱。

　　侯克要冧波图粉丝

　　相反，俄超辛尼特唔甘心做山寨王，希望喺欧联威威，况且佢哋大把钱，阵中有侯克同韦素等勐将，又有意大利名帅史巴列堤领军，对闯入欧联分组赛可谓志在必得。而侯克去年9月匆匆由波图过档辛尼特，嚟唔切同一众波图粉丝道别，今次借住重游旧地嘅机会，踢番场好波向「中立球迷」致意，战意唔使怀疑。

　　辛尼特各项条件都赢晒费利拿，首回合先拔头筹冇难度，直取客胜。