新帅加迪栽培新人有料到

　　正所谓初生之犊不畏虎，里昂班o靓仔仲要打顺条气，唔赦皇家苏斯达!欧联附加赛首回合法甲里昂主场斗西甲皇家苏斯达，里昂年轻化收到成效，开季4连胜兼打起小将拿卡锡迪，客军正印前锋阿基列斯缺阵攻力削，里昂让得起平半!

　　(有线64及203台周三凌晨2时45分直播)

　　欧洲新球季啱啱开始，细鬼又有机会同大家讲波经。呢季我会主力分析周中欧联赛事，为读者推介好料!係人都知欧联水准高又够星味，豪门都吼实呢个大金矿，依家进行附加赛，边队赢咗就可杀入分组赛，各路雄师一定搏到尽。

　　苏斯达缺箭头难偷鸡

　　里昂一向係欧联常客，但近年畀巴黎圣日耳门、马赛爬头，今年风头更不及摩纳哥。呢班波为配合法国搞下届欧洲国家盃要起新球场，所以要行「紧缩政策」，多名高人工主力如巴菲迪比高美斯已遭弃用，利辛度卢比斯、洛夫云等亦被卖走。但有句说话叫「柳暗花明又一村」，新帅加迪之前由二队升做主教练，非常熟悉队内青训体系，加上球员时代曾効力阿仙奴，深受恩师云格影响，故对栽培年轻球员特别有心得，例如拿卡锡迪、加连尼亚、乌姆迪迪等B队产品，新季都交到功课，尤其拿卡锡迪头2场联赛入3球，真係唔讲得笑!年轻球员係打道气，依家里昂气势正盛，想勒都勒唔住。

　　苏斯达方面，今夏除伊拿拉文迪被卖到皇马外，其馀主力均在阵，不过正选箭头阿基列斯倦勤，今仗作客更缺乏争胜本钱，呢场都係死守，到次回合先搏杀，受让平半都咪掂。