事隔九年，皇家苏斯达再踏欧联赛场，03至04年度球季苏斯达以联赛亚军身份，征战这项高水平赛事，阵中为人熟悉嘅，除锋线双煞高华斯域及尼赫治之外，仲有中场指挥官、现効力皇马嘅沙比阿朗素，不过与皇马、巴塞等豪门相比，呢支巴斯克兵团阵容太单薄，难以负荷两线作战嘅压力，众将疲于奔命下，成绩大跌，喺联赛沦落到排十五，但比同样杀入16强、最终降班收场嘅切尔达，算係不幸中之大幸。经历过咁惨痛嘅教训后，如何在欧联同联赛之间取得平衡，都几考苏斯达少帅阿拉沙迪嘅功夫。

　　命运弄人再遇剋星里昂

　　虽然里昂已成褪色劲旅，但欧战表现特别Sharp醒，唔计上季，佢哋之前连续十二届至少杀入分组赛，2010年更历史性闯入四强，因此欧联经验远胜苏斯达。无巧不成话，当年在16强淘汰苏斯达嘅，正是係今场对手里昂，唔通又係呢支昔日法甲七连霸，终止苏斯达嘅欧联之旅?