两军史丹福桥驳惯火

　　阿士东维拉八个月前作客车路士大败0比8元气大伤，差啲搞到降班，今次重临凶地，维拉队长华亚尔话明唔赦车仔。而车路士喺新帅莫连奴带领下进攻水银泻地，今次两支当弗球队英超次轮撞到正，预期哨响即驳火，半场大盘博得过!(now 621周四凌晨2时45分直播)

　　车路士去年年尾失意世冠盃，返到联赛搵维拉出气大胜8比0，嗰场全军上下个个都有火，八个士哥分别由七个球员射入，维拉门将巴特古辛喺网窝执波执到慌!相隔八个月，维拉今次再去到史丹福桥球场，佢哋挟客场砌低阿仙奴馀威出征，现时信心好强，队长华亚尔上季冇份喺大败一役受罪，但都戥队友唔抵，佢话大军上季惨败令佢哋决心更大，今战会沿用上场杀败「兵工厂」嘅战术杀敌。

　　丹巴巴亚或替费托

　　车路士旧帅莫连奴重掌球队后，开锣战主场出战上半场头廿分钟狂攻侯城，一班中前场球员快速互传入渗，主攻踢法好鬼劲。车仔上仗早段入咗两球后攻势放缓，主要因为侯城畀唔到太大威胁佢哋，但今场对手维拉啲快速反击极具威胁，一众球员都唔会轻敌。从上场演出所见，车路士进攻主力夏萨特、奥斯卡杜斯山度士等都好弗，前线费兰度托利斯係咁上下料，莫帅有机会轮换改派丹巴巴亚攻坚。

　　睇番两军近季喺史丹福桥球场对战经常合演入球骚，车仔2010年3月试过以7比1狂数维拉，双方亦试过踢成3比3及4比4，佢哋近六次喺车仔主场碰头半场坐底都有两球交收，斗得灿烂，今战可博半场大盘!