个阵甩皮甩骨 点让费伦巴治

　　得番8个一队成员，兵工厂作客仲要让波?有冇搞错!欧联附加赛首回合，费伦巴治主场斗阿仙奴，客军伤兵多到吓死人，领队云格唔知点排阵之馀，最近仲被传媒、同行及自己友丧插搞到方寸大乱，费伦巴治面对甩皮甩骨嘅对手，受让笋爆!(有线61及201台周四凌晨2时45分直播)

　　今夏号称有7,000至1亿镑扩军嘅阿仙奴，最终买人得个桔，只係免费签入法国小将耶耶辛洛高。球队并无加深板櫈深度，结果新季英超首仗就「现眼报」，主场1比3输畀阿士东维拉，而且仲一次过伤晒阿历士张伯伦、沙格拿、基兰基比斯、路斯基同艾朗蓝斯，正选阵容得番梅迪萨卡、韦舒亚、辛迪卡索拉、禾确特、普多斯基、基奥特健健康康，云格被逼徵召4名青年军随队，认真湿滞!

　　加历查嘲买人「临急抱佛脚」

　　云格知衰即刻慌忙出价罗致纽卡素中场卡比耶，点知畀对方嫌出手低，又畀喜鹊领队柏杜话喺呢个时候提出收购係唔尊重佢哋。已经退休嘅利物浦名将加历查都出嚟「抽水」，话云格如果咁锺意卡比耶，点解唔早一个月买佢，依家咁做睇到云格只係「临急抱佛脚」，就算买到人都唔会帮到球队。

　　其实外界批评唔紧要，最惨连自己友都唔撑，前锋基奥特赛前都话兵工厂需要引入多一名前锋，摆明落云格面，面对内忧外患，云格想闯过欧联附加赛呢关真係唔容易。今晚对手费伦巴治本身係唔嘢小，呢支土耳其劲旅上季获联赛亚军兼盃赛冠军，古积特、鲁尔梅利斯及安利都有级数，主队受让值得捧场!