韦拿倒戈撼美斯火爆

　　西班牙超级盃首回合开骚，由上届西班牙盃盟主马德里体育会主场迎战联赛冠军巴塞隆拿，焦点落喺新加盟马军嘅射手韦拿身上，以往佢同巴塞王牌美斯劲多牙齿印，搞到被投閒置散，今仗首度倒戈，誓要射爆旧东家一吐乌气，况且两军交手例演入球骚，大盘有买趁早。(now 632周四清晨5时直播)

　　当初韦拿喺巴塞为咗迁就美斯改踢左翼，士哥助攻瓣瓣有，任劳任怨交足货，不过美斯唔多Like佢，试过韦拿入波唔同佢庆祝兼黑面，上季对CF格兰纳达，因为韦拿喺死位选择射波而非回传而错失良机，激到美斯扎扎跳，两人即时吵大镬，冇耐韦拿就被换走，并且长坐冷板雪到硬晒，摆明係得罪球王嘅下场，亦严重影响韦拿嘅状态。

　　近15次对碰全开大

　　忍无可忍嘅韦拿今夏低价改投马体会，不但可长期担任佢最锺意嘅中锋，仲有得踢欧联，对佢争取入选国家队玩明年世盃大有帮助，如今重遇仇人美斯，更会加多两钱肉紧，佢赛前明言今仗入波一定庆祝，配合脚风颇顺嘅迪亚高哥斯达，火力强劲。

　　当然巴塞亦非善男信女，喺新帅马天奴领军下，重拾前场压迫踢法，逼到对手有气冇碇抖，其接手后四仗狂轰25粒，依家众将信心爆棚，连之前为人诟病嘅法比加斯及阿历斯山齐士亦有复甦迹象，上仗联赛大炒利云特七蛋，法比仔就送出三次助攻，而马帅去到下半场先让「新比利」尼马披甲及换走美斯嘅举动，摆明係为今场波做好准备。

　　翻查纪录，若果以中位数2.5球计，双方近15次碰头竟全部开大，当中不乏4比3、5比2、4比2等大手交易，为争新季首项锦标必搏甩髀，入球大属不二之选。