今晚上演两场西甲，戏码较强嘅係尾场毕尔包扑击奥沙辛拿。「巴斯克雄狮」今场会借用皇苏主场圣塞巴斯提安艾奴伊达球场出战，自主帅华尔维迪回巢后，成队波焕然一新，首轮已赢咗华拉度列，当然想乘胜追击，事实上奥沙辛拿属老弱残兵，作客肯定被攻到气咳，入球大咪走鸡。

　　(周六凌晨4时开赛)

　　毕尔包新球场未搞掂，要借用死敌皇苏主场顶住先，会方今季搵嚟前华伦西亚教头华尔维迪领军，由于此君以前也曾执教过毕尔包，因此佢明白球队嘅问题所在，今夏签入贝迪斯嘅好波之人比纳特，中场有番位领军人物，连带令两翼马高苏沙亚达及蒙尼恩都即时生晒，配合华帅嘅主攻战术，火力全开时攻击力唔讲得笑。

　　有望过吓一哥瘾

　　奥沙辛拿一向莫财，今季继续冇钱增兵，甚至连主力前锋安历基苏拿都卖埋畀今场对手毕尔包，依家仍要重用年届37岁嘅老人家宾奴，前景堪虞。毕尔包喺开锣战赢咗华拉度列，由于今场放周六凌晨开波关係，今仗只要有分落袋，即可上榜首过吓一哥瘾，因此「巴斯克雄狮」求胜心切一定狂攻，入波唔会少，大盘有买趁早。