今场英超上演亚洲老闆大对决，升班球队卡迪夫城主场挑战劲旅曼城，「卡城」有马来西亚富商陈志远撑腰，今夏使咗超过2,000万镑增兵，支出係三支升班球队当中最多。不过，富豪球会曼城嘅阿联酋老闆文梳亚今季丧烧近亿镑扫货，超豪阵容星光熠熠，并非杂牌军「卡城」所能抵挡，直取2倍「让球客胜」!

　　(now 621周日晚11时直播)

　　「红龙」衰在冇火力

　　「红龙」卡迪夫城成功杀上英超，老闆陈志远拍心口话会科水买人，佢并冇食言，今夏先后引入热刺中坚哥尔卡、西维尔中场加利美度及哥本哈根前锋哥尼利斯等，当中以前两者较具名气，淨係呢三件新兵都要超过2,000万镑转会费，配合韦定咸、比拿美同费沙甘保等升班功臣，人脚唔算太差嘅，但到底能否企稳英超，仍然有待观察。睇番开咧战演出，「卡城」最大问题係进攻乏力，作客中型班韦斯咸全场仅得一次射门中龙，呢次硬撼曼城更难乐观。

　　「蓝月亮」攻力得人惊

　　曼城老闆文梳亚贵为阿联酋超级富豪，佢轻轻开水喉畀新帅比历连尼买人已经好得人惊，新季增兵四大天王费兰甸奴、捷西斯拿华斯、祖维迪及尼格度，加埋烧咗接近一亿镑，配合迪斯高及阿古路等星级攻击球员，成功打造全英超最劲嘅攻击团队。「蓝月亮」曼城联赛首战主场对纽卡素，阵上清风送爽大胜4比0，射手尼格度只係尾段入替，祖维迪直头唔使踢，已经赢到「喜鹊」冇得打，姿态真係好惊人，今次遇上升班球队卡迪夫城，随时又开杀戒。

　　曼城队长高柏尼今场因伤休战，唔少球迷担心佢哋后防唔够稳，不过，另一中坚拿斯达锡已经伤愈，可以同尼史葛扼守中路，老老实实，稳就唔係好稳o架喇，但考虑到「卡城」冇乜攻力，相信已经够杀。

　　领队Chit Chat

　　马基麦基(卡迪夫城)：淨係睇见曼城后备席坐紧啲乜人，已经知佢哋係顶级球会，但我深信曼城都会尊重我哋。

　　比历连尼(曼城)：我希望球队踢得更具侵略性，无论赢输，全场不断争取士哥，相信球员都好享受呢种打法!