上周有两宗转会交易备受瞩目，就係韦利安转投车路士及加里夫巴利天价加盟皇马，虽然仲未落实，但睇嚟车仔同皇马均志在必得。平心而论，Peter对呢两宗交易并不睇好。首先，车仔靠班主阿布拉莫域同安治老闆克里莫夫嘅友好关係，拦途截劫已去热刺体测嘅韦利安，此举不但犯众憎，而且睇番车仔阵中已有桑马达、奥斯卡杜斯山度士、夏萨特等进攻中场，加埋宝刀未未老嘅林柏特，呢个位置根本唔缺人，韦利安上「车」只会令争位情况更加激烈，随时适得其反。

　　天价加盟埋内讧伏笔

　　至于加里夫巴利转投皇马一事搞咗成个暑假，9,900万欧元转会费及1,000万欧元年薪实属天价，难怪未上舰已惹嚟皇马众星眼红，为内讧埋下伏线。

　　加里夫巴利以快速及体力化踢法扬名，但毕竟係血肉之躯，佢呢种打法容易受伤。与英超快上快落嘅比赛节奏相比，西班牙足球对技术、整体合作嘅要求更高，热刺主帅保亚斯係以巴利仔为核心制订战术，凸显其单天保至尊嘅威力，但嚟到拥有C朗、奥斯尔、艾斯高、宾施马嘅「银河舰队」，巴利仔只係其中一粒星，好难再享有喺热刺嘅进攻自由度，能否适应令人怀疑，因此Peter认为呢宗交易只有一位赢家──热刺。