寸王捉鬼最拿手

　　英超周二凌晨上演超级大战，「寸王」莫连奴率领车路士挥军造访曼联，「寸王」返咗车仔后力斟「红魔鬼」射手朗尼，增兵为名，扰敌为实。呢个星级教头之前带领车路士十战曼联仅一败，连英伦传奇教头费格逊都怕咗佢，区区一个莫耶斯唔係佢对手，车仔受让着数，1.58倍「让球客胜」捧得过!

　　(now 621及620周二凌晨3时直播)

　　今场赛事焦点落喺曼联射手朗尼身上，莫连奴重掌车路士后主动放风，摆明车马将呢个英格兰球星视为头号收购目标，呢招其实係效法费格逊上季撬走阿仙奴王牌前锋尹佩斯，务求做到损人利己，削弱「红魔鬼」争标本钱。

　　虽然现时未成事，但佢已经搞到朗尼心郁郁，就算最终撬唔到人，都可收到扰敌之用，呢招真係好高。曼联新帅莫耶斯企硬唔放人，赛前仲话朗尼劲有机会喺今场打正选，有心向莫连奴示威。

　　莫连奴食住莫耶斯

　　Special One莫连奴係球坛奇葩，连曼联传奇主帅费格逊都畀佢剋住，佢嚟到英超率领车仔打倒「红魔鬼」霸权，04至07年领军十战曼联法定时间录得5胜4和1负，连费Sir都服咗佢，两人亦敌亦友，关係微妙。莫连奴同期带领车路士八战由莫耶斯领军嘅爱华顿取得5胜3和，当然，爱华顿嘅实力唔可以同曼联相提并论，但曼联当年有老费照住都唔係莫连奴嘅对手，依家改由莫耶斯接手，唔少人担心佢都係畀莫连奴食住。

　　曼联阵容残过车仔

　　曼联今战续有右闸拉菲尔达施华、快翼艾舒利杨格、拿尼及车仔剋星查维亚靴南迪斯都要养伤，仲未齐脚，前线预期会由尹佩斯、韦碧克同朗尼组成进攻铁三角，前两者季初展现理想状态，论攻力係唔错。

　　至于车路士就喺上周中踢多一场苦战险胜阿士东维拉，本月底又于欧超盃斗拜仁慕尼黑，搏多一场兼有后顾，睇落蚀章。不过，自莫连奴上任后，大军进攻发挥明显有改善，今战几近可夫添出击，有力保持不败。

　　领队Chit Chat

　　谦逊莫耶斯(曼联)：于新一代年轻领队中，莫连奴的确出类拔萃，甚至係最出色嘅一个，所以佢力足执教世界上任何一支劲旅，包括曼联。我教曼联当然係为了夺标，亦好期待能同莫帅正面较量。

　　寸嘴莫连奴(车路士)：费格逊同莫耶斯边个劲啲?大家唔好玩啦，如果我係莫耶斯，绝对唔想记者再问呢个问题。另外，我觉得曼联应该卖朗尼畀车仔，咁先唔会削弱英超嘅吸引力，我都唔知佢哋惊乜!