一队留力打吡 一队冇心冇力

　　欧联附加赛次回合，英超劲旅阿仙奴回师主场迎战土耳其代表费伦巴治，「兵工厂」首回合淨胜三球，形势大好，今战保住胜局即可晋级，必以守行先，唔会同你癫!费伦巴治上次喺自己嘅「地狱主场」出击冇段好睇，摆明冇计，无力製造奇迹，预期今战少入波，两队齐献「细」，推介1.59倍半场细!(有线61及201台周三凌晨2时45分直播)

　　兵工厂揸住三球唔同你癫

　　阿仙奴首回合用咗半场时间试探敌军虚实，Feel到费伦巴治冇料到，换边后一发力就由基兰基比斯、艾朗蓝斯同基奥特建功大胜3比0，纯赢级数，冇得倾!「兵工厂」基本上稳夺分组赛入场券，今场有啲例行公事味道，大军仍然伤兵满营，守将华美伦、中场阿历士张伯伦、阿迪达及戴亚比唔踢得，佢哋嚟紧周日要同死敌热刺合演「北伦敦打吡大战」，今战冇必要去得太尽，就算派班正选上阵，Hea踢机会都好高。

　　费伦巴治欧赛前途未卜

　　费伦巴治其实拥有唔少名将，古积特、鲁尔梅利斯及安利等曾喺英超战场留低唔少脚毛，不过，睇番首回合战况，三位巴打退步甚速，古积特一味死跑烂跑，鲁尔梅利斯及安利都变晒隐形人，大军全场冇乜真正黄金餐士，今次离开主场更难反抗，即使有心收复失地，恐怕亦会枕住捱打。费伦巴治因为打假被禁止参与欧洲赛两年，依家上诉紧未知结果，情况都唔多乐观，队内将士气氛麻麻，随时无心恋战。

　　两队08年曾喺欧联分组赛碰头，阿仙奴作客5比2大炒费伦巴治，返到主场同对手互交白卷。睇嚟「兵工厂」今战将倾力发挥地面组织功夫仔，全场搓搓搓疯狂揼波钟，估计士哥唔多，「半场细」博得过。