欧联附加赛次回合赛事，瑞士劲旅巴素利主场决战保加利亚球队卢多格德斯，巴素利首回合作客都赢4比2，呢班波上季喺欧霸盃单挑英超双雄热刺同车路士不落下风，够料打欧联，新季留住「埃及小王子」穆罕默德沙拿，中前场勐将如云，攻到你晕，捧大最好!(有线62及202台周三凌晨2时45分直播)

　　巴素利喺上届欧霸盃上晒身，八强火併英超实力分子热刺两回合踢成4比4，最终射赢十二码进身四强，准决赛恶斗另一伦敦球会车路士虽然输波，但踢落虎虎生威，赢尽口碑。巴素利新季留住大部分主力，包括埃及超新星穆罕默德沙拿，佢首回合就梅开二度成为功臣，会方仲搵番阿根廷嘅马迪亚斯迪加度回巢，配合快翼史托卡及老牌射手马高史达拿等攻击好手，火力好劲。

　　保加利亚球队卢多格德斯喺11至12年度球季升班，首季即赢取联赛锦标，上季成功冧庄。佢哋阵内除土炮以外，南美帮势力都好大，淨係巴西兵都有五件，最具名气係曾经嚟过南华落班嘅巴西前锋柏天尼(Michel Platini Mesquita)，佢上场喺56分钟落场，球队由赢紧2比1变输2比4，惨成黑脚!大军现时形势差，佢哋条防线喺国内係一流，出到欧洲赛只係九流，今战焗攻恐会再被炒，捧大盘啱数!

　　历基亚「细」玩星队

　　另一场波兰历基亚主场斗罗马尼亚布加勒斯特星队，星队首回合捉到鹿唔识脱角，领先下被对手逼和1比1。历基亚上圈淘汰挪威莫迪情况和如今同出一辙，手执一个作客入球，大可以歎慢板玩死守，捧入球细。

　　(有线63台周三凌晨2时45分直播)