今晚阿King对法联盃第二圈卡昂主场硬撼欧塞尔最感兴趣，前者上仗联赛意外输波谷埋成肚火，撞正作客唔掂嘅欧塞尔，势必搵佢做出气袋，1.65倍主胜有计。

　　(周三凌晨零时45分开赛)

　　上季喺法乙排「梗颈四」未能升班嘅卡昂今季火速上力，联赛连盃赛头四场赢晒，前线杜咸姆、拿巴等把握力强，喺乙组可谓超晒班，不过上仗临天光濑尿不敌特鲁瓦，成班球员劲唔忿气。欧塞尔不嬲係靠主场搵食，一离开自己地头就脚软，况且佢哋近四次作客卡昂全部输晒，遇上满腔怒火要搵人发洩嘅卡军，今仗听做炮灰，一于捧主胜。

　　另一场法联盃朗斯对格迪尔，朗斯贵为乙组一哥，实力有番咁上下，格迪尔踢法有前冇后，加埋弗爆嘅三叉戟安达亚施马、列沙治及卓克尼度耶，唔怕同朗斯斗攻，入球大最好路。最后苏联盃第二圈拉夫流浪对赫斯，后者冇受财困影响表现，愈战愈勇，上仗人少打人多照赢鸭巴甸，食住个势可击败苏冠仔拉夫流浪。