阿里基保饭碗 丧攻燕豪芬

　　欧联附加赛次回合重头戏，AC米兰主场斗燕豪芬，今仗将成AC教练阿里基嘅「审判日」，老闆贝鲁斯干尼下密旨，若球队出局就会攞佢祭旗。阿里基唔想一开季即失业，实在不容有失，阿里基手上最强武器始终係射手巴洛迪利，应会尽量发挥进攻强项，减轻防守压力。首回合打和1比1，燕豪芬失作客入球亦冇得退缩，阵中年轻球员胜在体力充沛，拚劲十足，可望撕开主队防线，首选1.68倍入球大。

　　(有线61及201台周四凌晨2时45分直播)

　　阿里基同贝鲁斯干尼关係欠佳，过去两季不时传出换帅消息，两个月前阿里基更几乎转教罗马，但由于球会莫财，AC成绩唔算差，阿里基拥有唔少支持者，老贝唔敢贸然炒佢。不过AC喺意甲开锣战不敌升班马维罗纳，如果欧联出局，将连累球会损失最少3000万欧元收入，老贝就有大条道理请阿里基食无情鸡。

　　伤疲尽起火力提升

　　虽然教练执包袱属平常事，但阿里基绝对唔想衰喺「敌人」老贝手上，基于内部「矛盾」，阿帅唔会甘于死守0比0晋级。事实上，AC最弱就係防守，首回合及上仗联赛，都係领先下，分别被扳平及倒输，阿里基应该学精，今仗以攻代守，入多几粒保胜果，先至係上策。巴洛迪利威力有几大已毋须多讲，罗宾奴已伤愈复出，奇云保定伤势亦无大碍。新加盟嘅安德列普利亦值得留意，呢位「新派路」首回合后备上阵，大大改善中场组织力，上仗联赛更入波，预料今场会担正，进一步提升AC火力。

　　朴智星专破AC大门

　　燕豪芬首回合表现更胜AC，製造唔少威胁埋门，呢班波重用年轻球员，呢班生牯仔体能强、速度快、技术出众，韦拿杜姆、马达夫斯、阿当马希皆被誉为新一代彗星。唔好忘记仲有南韩名将朴智星压阵，佢曾于05年欧联4强为燕豪芬射破AC大门，3年前亦助曼联作客3比2击败AC，堪称AC剋星，有佢在阵，队友信心都大啲。燕豪芬今仗首要目标係入波，抵消首回合失嘅作客入球，或一开波就反客为主，同AC驳火。