日职快车期爆发「上位对决」，二哥横滨水手主场大战三哥浦和红鑽，两支名牌球队各有车厂撑腰，水手获日产支持，红鑽就有三菱条水喉射住，两队每次碰头都备受瞩目，喺对手主场仲特别肉紧。双方近十次交手主场一方未尝一胜，红鑽受让必捧「让球客胜」!

　　(有线61及201台周三晚6时30分直播)

　　日产悭家 水手老化

　　日本两大车厂日产同三菱一向属竞争对手，今年佢哋联手出新车，唔代表真係好Friend，甚至有指呢个举动只係日产吞併三菱嘅第一步。两大汽车业巨头由商场斗到落球场，横滨水手背后金主係日产汽车，而浦和红鑽就由三菱汽车全力支持，两军好耐冇喺日职威过，今季齐齐位处前列，令今场争标「六分波」更有睇头。

　　苏豪今季一直唔睇好横滨水手前景，皆因日产近年投放资源唔多，大军冇乜新血，依家只靠四大长老杜查、中泽佑二、中村俊辅同马昆奴斯撑住，当中最后生嘅中村都卅五岁。水手上场作客鹿岛鹿角上半场领先一球，换边后长期捱打，中后段畀生牯仔大迫勇也连o赵两粒，最终落败，四大长老搏足全场，匆匆再战恐怕好快莫气。

　　相比之下，浦和红鑽近年肯使钱得多，佢哋上年撬走广岛三箭名帅柏度域，先后引入守将槙野智章、森协良太、中场关口训充及前锋兴梠慎三等优质土炮，人强马壮，现时仅落后榜首双雄广岛三箭同横滨水手一分，今场赢埋随时可杀上榜首。睇埋往绩，两队近十次对战主队一和九败，红鑽近三次作客水手赢晒，受让必捧!