哥帅寸王细不两立

　　今晚欧洲超级盃，上季欧联冠军拜仁慕尼黑，于捷克布拉格中立场出战上季欧霸盃冠军车路士，两军新帅哥迪奥拿同莫连奴冤家路窄!两个互相熟悉嘅对手，背负沉重唔输得嘅压力，分别带领两支仲未磨合好嘅球队，今场预期会比较保守，黑柴推介1.95倍入球细。

　　(有线61及201台周六凌晨2时45分直播)

　　硬推巴塞踢法 攻力骤减

　　哥迪奥拿同莫连奴昔日分别带领巴塞隆拿同皇家马德里，喺西甲打生打死，今次係两人第16次对决，计往绩，哥帅暂时以7胜5和3负领先。不过喺佢离开巴塞前嘅一季，两次对住莫帅都赢唔到，而且佢嘅所有荣誉都係喺巴塞取得，比起去到边威到边嘅莫连奴，成就仍然稍稍逊色。两人今季都係新官上任，今场欧超盃大家都唔衰得。

　　哥迪奥拿接咗上季赢尽锦标嘅轩历基斯帅印，由季前热身赛、德超盃到踢咗4轮联赛，球队攻守表现都不及上季，呢位12岁开始喺巴塞少年队成长嘅教练，脑海中巴塞式踢法根深柢固，硬推落拜仁度，令一众上季踢到晓飞嘅球星无法尽展所长，上场联赛更玩轮换收起半队主力，搞到失分畀弱旅弗赖堡，外界批评声音愈嚟愈响，哥帅承受沉重压力。事实上，拜仁喺佢手上进攻线虽然多咗人，但太着重控球同短传中路入渗，无法保持上季嘅进攻效率。

　　不满锋线组合 宁愿稳守

　　至于莫连奴重掌车路士帅印，由佢今夏一直追逐朗尼.近期又斟伊度奥，就知对手上嘅锋线人选有几不满，费兰度托利斯上仗只任后备，到上阵时亦碌碌无为，丹巴巴亚同卢卡古都不受重用，上场联赛作客曼联，莫帅索性摆无锋阵，刻意主守下取得0比0嘅满意赛果，今场对住上季「3冠王」拜仁，料会照办煮碗，以守为先。

　　过去10届欧超盃有一个有趣数据，每逢单数年都由上届欧联冠军捧盃，相反双数年就由上届欧霸盃盟主称雄，今届係单数年，莫非预示奖盃将落入拜仁之手?但观乎双方目前都未执掂队波，今场估计会係拉锯战，入波相信唔会多，入球细好路。