搵侯城出气 半场大好路

　　英超是日早场上演双城会，曼城主场对侯城，同係阿城，但此城不同彼城，巨型班曼城上周啱啱畀升班球队卡迪夫城打沉，后防缺少大将高柏尼有如不设防，今战惟有以攻代守，避免再出丑!蚊型球会侯城花名虽叫「老虎」，但班后衞係「纸扎」嘅，普遍得英冠级数，难顶曼城狂攻，预期半场会连番失守，博2.05倍半场大!

　　(now 620及621周六晚7时45分直播)

　　「蓝月亮」曼城上次作客卡迪夫城畀对手逼到乱晒龙，战至下半场虽凭迪斯高靓射先开纪录，但最终竟反胜为败，真係丑死怪!归根究柢，佢哋都係后防出现问题，队长高柏尼受伤休战，教头比历连尼当咗自己队波係巴塞隆拿，求其搵防中查维加西亚串演中坚，结果梗係出事啦，人哋巴塞长期控住个波唔使点守，你曼城嚟o架咋，醒吓啦!

　　「英冠防线」顶唔住蓝月亮

　　高柏尼继续养伤，经过上次失败试验后，比帅唔敢再乱嚟，中坚拿斯达锡伤愈踢得，势将伙拍尼史葛扼守中路，叫做好啲啦，但都要提防近期失晒信心嘅门神赫特再有甩漏，曼城让球主客和「-2」好高风险，博唔过。不过，曼城攻击球员始终有质，开咧首战主场对纽卡素早喺廿零分钟赢住两球，只要发挥正常，要喺半场入几粒锁定胜局非难事。

　　「老虎」侯城刚喺联赛盃同英甲仔奥连特斗足一百二十分钟险胜，佢哋几近以全副选阵容出战，无论大战几百回合都唔会影响今场战斗力。侯城今夏引入热刺孖宝侯度史东同积基利华摩亚锐意加强中场控制力，但佢哋后防仍然用紧占士谢斯达同艾穆罕默迪等只得英冠级数嘅球员，上场联赛主场斗诺域治勉强保住不失，今次作客被围攻好恶顶。

　　领队Chit Chat

　　比历连尼(曼城)：上场我以为球队会赢1比0，防守死球係重要一环，我哋上场做得唔好，由今场开始要做好呢个工作。

　　布鲁士(侯城)：我哋想搵个一季入到廿球嘅射手，但呢啲球员通常都好贵，我会努力搵目标，宾特拿係唔错嘅人选，但佢人工高，仲要再计吓数。