富咸刚于英联盃作客乙组仔伯顿，领队祖尔好有诚意，几乎尽出正选应战，但最后打足120分钟射埋12码先至过到关，整体演出极曳。大军平均年龄唔细，事隔四日又匆匆作客纽卡素，「喜鹊」上次主场赢波正正係赢富咸，今次可斩多四両兼喺联赛开斋!

　　睇番富咸阵容其实唔曳，贝碧托夫、柏加、加拉高尼斯、轩治兰特都有卡士，但个个都一把年纪;前锋拜仁雷斯係好波，但又嫌盘扭过多，又唔够硬淨。以上几个主力除「Hea碧」外，上仗对伯顿都有踢足90分钟，仅抖几日就要造访圣占士公园球场，富咸客场战斗力将曳上加曳。

　　卡比耶复出镇住

　　纽卡素阵中都有唔少伤兵，包括迪奥迪、约拿斯古迪利斯等，但中场大脑卡比耶能够复出领军。领队柏杜已做晒嘢，呼吁球迷唔好因佢有意过档阿仙奴而嘘佢，相信班「鹊迷」唔係傻嘅，柴爱队最好波嗰个台，唔通真係唔想赢咩?