下星期小妹会去东京拍旅游节目，但时间紧凑，未能入场睇日本对危地马拉，为迁就国际赛期，日职加开周中快车，其中FC东京喺主场2比3输畀鸟栖砂岩嗰场我就最失望。当日「东京」其实唔算踢得太差，闪电连失两球，其后喺下半场追和，点知贪心急于赢番转头最终输埋。今日佢哋作客广岛三箭被睇低一线，我博东京不败。

　　(有线61及201台周六晚6时直播)

　　三箭颓颓哋让唔起

　　「三箭」周中不敌甲府风林，一班中前场又失准，连射门次数都唔够对手多。球队已经连续三场不胜，状态颓颓哋，今日再衰多次又有几出奇?FC东京防守係唔太稳阵，但上场有波入嘅渡边千真依家喺射手榜第二，所以佢为公为私都会力争「士哥」，加上仲有长谷川阿里亚同高桥秀人呢两位有埋门能力嘅队友后上支援呢!

　　今日FC东京作客，所以压力喺主队三箭身上，咁对目标係摸和攞番一分嘅东京有利，如果「东京」生生性性逼和主队，我就可以买多啲战利品返香港喇。