计卡士、状态、战斗力，今场「双红会」肯定係近年最接近嘅一次，入波唔会少!英格兰「国家打吡」利物浦主场斗曼联，红军以近4年最佳联赛开局状态迎敌，惜高路托尼有伤，难再保清白之身;红魔鬼近4次斗红军场场入2粒，尹佩斯又弗爆，捧大盘!

　　(now 621周日晚8时30分直播)

　　谢拉特遇魔特别醒神

　　利物浦同曼联，属英格兰两间最成功球会，进入英超时代，红魔鬼垄断联赛，係夺得英格兰顶级联赛最多球队(20次)。利物浦05年虽亦爆冷擸走欧联，但联赛碌碌无为却係事实，近年连欧联都冇得打，已被踢出「big4」行列。不过，无论呢个Match up几时、喺边度举行，又或者双方实力、状态如何，都完全唔重要;为名誉、为面子，大家落到场都会搏尽，战情必定紧凑精彩。

　　本季红军转运，开季2连胜，加上于英联盃过关，队长谢拉特话佢哋一班队友都觉得本季唔同咗，依家信心爆棚，而曼联传奇领队费格逊已退休，由莫耶斯接掌，对手「降呢」更增加红军争胜决心。虽然苏亚雷斯仲坐紧波监，但史杜列治劲勇，连续3场有波入，而且菲腊比古天奴表现抢镜，加上谢拉特对亲红魔鬼都踢到晓飞，近6次佢有出场嘅联赛较量，「神奇队长」入咗4粒，红军今仗好难冇波入。后防方面，利物浦新季2场联赛都冇失波，只因新门将米洛列特频频「神救」;但大将高路托尼有伤，随时同新左闸阿里施苏高齐齐倦勤，未必顶得住红魔勐攻。

　　尹佩斯拍朗尼火力勐

　　费格逊一去，莫耶斯接手压力好大，但红魔鬼毕竟基业厚，就算莫帅卡士唔够，曼联表现唔会差得去边。至于利物浦唔会好似车仔上仗去到奥脱福咁缩后踢，尹佩斯又有大把机会搵食，再加埋朗尼已叠埋心水留队，将会重新专心杀敌。双方入波条件多到泻，将会继近9场对赛7次开大后，再开出大盘。