Super Sunday 睇个够!

　　踏入九月第一日，本地及欧洲球坛爆发新球季第一个高潮，本地两大劲旅东方沙龙、南华下午初登场，黄昏有今季首场西甲早场皇马陪你食晚饭，夜啲轮到两场英超大战「双红会」利物浦斗曼联及「北伦敦打吡」阿仙奴对热刺，最后仲有西甲班霸巴塞隆拿压轴亮相，连同多场德甲、荷甲及葡超，呢个Super Sunday电视直播赛事达14个半小时，睇少任何一场随时都係你损失!

　　舰队乱七八糟点吔包

　　今晚西甲超早场，由皇家马德里坐镇巴拿贝主场迎战毕尔包。虽然皇马星光熠熠，但在新战术下个个都踢得唔开心，连以往入波当食生菜嘅王牌射手C朗，至今仍未开斋。相反，毕尔包开季连赢两场，众将信心爆棚，「银河舰队」让唔起毕军2/2.5球，下盘有买趁早。

　　(now 632周日晚6时直播)

　　皇马一向不乏球星，如何令呢班大帝开心踢波，係一门高深学问。上季教头莫连奴以铁腕治军，促使内讧不断，今季搵来顺得人安察洛堤带队，会长皮里兹买乜人返来，佢谂都唔谂全部炒埋一碟，实唔会得罪老闆喇，但中前场一口气用晒奥斯尔、艾斯高、C朗、莫迪历，削弱防守之馀，太多核心欠主次之分，反令进攻乱七八糟，射手C朗愈心急愈开唔到开斋，之前两仗联赛只能险胜有办你睇，中场灵魂奥斯尔上仗被换出时，仲嬲到直接返更衣室，门将队长卡斯拿斯又继续沦为后备，个个都唔开心，点样踢好波呀?

　　毕尔包连胜返正轨

　　上季毕尔包卖走大佬查维马天尼斯，搞到群龙无首，加上「疯子教头」比尔沙同球员不和，成季表现浑浑噩噩，但今季华尔维迪重掌帅印后，呢班「巴斯克子弟兵」即刻生勐晒，其实佢哋前季杀入欧霸盃及西盃决赛，底质唔曳，只要团结就可重上正轨，开季两连胜绝非侥幸。当然，皇马质素远胜毕尔包，但「银河舰队」仍处于磨合期，问题多多，难赢气势如虹嘅「巴斯克雄狮」三球，一于捧下盘。