北伦敦打吡阿仙奴主场迎击死敌热刺，「兵工厂」今夏冇乜新球员加盟，季初又撞正伤兵潮闹兵荒，今战残阵出击。至于热刺就狂签人搞到出现人满之患。不过，无论两队出乜人，点都改变唔到近年北伦打吡例演入球骚嘅定律，今战必捧大盘!

　　(now 621周日晚11时直播)

　　再扫基斯甸艾历臣

　　阿仙奴今夏「险签」名单水蛇春咁长，结果只係免费签咗法国年轻小将耶耶辛洛高同旧将法米尼，实在不得不佩服云格守财功力。「兵工厂」现时有大批十字军，中坚华美伦、中场戴亚比、阿迪达、阿历士张伯伦同箭头普多斯基全部伤晒，连艾朗蓝斯同韦舒亚都有伤，个阵超残，但都要顶硬上。

　　热刺王牌球星加里夫巴利即将为球队带来天价转会费收入，教头保亚斯唔似云格咁孤寒，佢好似癫咗咁先使未来钱，继引入西班牙射手苏尔达杜及巴西中场荷西保连奴等勐将后，啱啱又签埋罗马嘅阿根廷球星拉美拿同埋阿积士进攻中场基斯甸艾历臣，依家啲人多到都唔知点用，所以有消息指佢有意借走德国中场贺治比，真係奢侈。保帅失控增兵过后，头两场联赛只係小胜1粒，霸气未现，似乎真係需时磨合。

　　近6次对战全开大

　　一队残阵，一队多新人，岂不是会影响双方发挥?热刺开季联赛连盃赛4场冇失波啵，捧大风险咪好高?唔好谂咁多无谓嘢啦!呢场係北伦敦打吡嚟o架，两队仇深似海，近年炮製咗一场又一场经典入球骚，双方近6次交手全大，「兵工厂」对上两次主场斗热刺都赢5比2，一场入3粒只係基本消费咋!