听朝巴甲有场榜尾大战，由包尾嘅纽迪高主场迎战尾二嘅圣保罗，前者战绩已经衰到贴地，近期于联赛屡战屡败，相反客队圣保罗摆脱季初嘅低迷，演出回稳接连抢到分，今仗作客仲要让波，摆明有计，一于捧上盘。

　　(周三早上8时开赛)

　　作客让波摆明有计

　　讲到巴甲近期最曳球队，非包尾大幡纽迪高莫属，佢哋踢咗15场输足11场不特止，只係入得9粒，真係非一般嘅鱼腩，阵中主力祖奥保罗及马兰夏奥均受伤患困扰，今场上阵成疑，众将愈踢愈冇信心，就算有地利都信唔过。

　　圣保罗季初表现失常，不但于联赛战绩下滑，又失落南美超级盃，8月头更飞咗去德国及日本踢热身赛，舟车劳顿下影响状态。好彩经过调整后，圣保罗逐渐上力，近四仗联赛不败，今仗仲有两大射手路尔斯法比安奴及艾莱斯奥刑满复出，攻力大增，绝对唔赦纽迪高，作客小让平半兼低水，摆明备受睇好，呢个上盘非常值博。